台灣彰化較倚山邊的平洋，佇立春前後，一期稻作陸續展開犁田(駛田)、播田作業。
今年入春到今(kàu-tann)一直無落雨，造成台灣半世紀以來上大的洘旱(khó-huānn)現象。我是田莊囡仔，自細漢厝內作穡，知影水敢若是作田人(作穡人)的生命，無水通灌溉對作田人來講是天大地大的代誌。為著灌溉用水，厝邊隔壁起冤家，相駡相拍的代誌，嘛定定聽著。阮田莊有一條水圳(圳溝)，號做大高圳，是頂游八堡一圳的分流，佇阮厝的後壁較西南爿的所在向西北爿流去，佇仝所在閣分流出一條向北爿的水圳，號做太平坑排水(溝)，拄好流過阮厝角的正後壁，彼條溝仔最後流入閣較大的舊社排水(溝)。
佇彰化縣，逐家攏知八堡圳(一圳佮二圳)是一條灌溉農田的水圳，阮兜種的稻仔，絞 (ká)出來的米號做濁水米，頂港有名聲，下港有出名。
轉來講本題，若搪著(tn̄g-tio̍h)犁田佮播田期，作田人著愛淹水落田。佇引水進前，代先清除涵空(âm-khang)內底的雜物，才會當順利流水，嘛有法度引水圳的水入細條水溝，才閣引水入田。
準若(tsún-nā)田倚佇水頭邊，遮是上好空(hó-khang)的所在，會使直接引水；若是佇水尾，著無赫爾好空，干焦 (kan-na)會當對大圳溝引水入細條溝仔，有定仔著用鋤頭佇細條溝仔剷(thuánn)出一个空，才引水落田底；閣有定仔對田岸挖一个空，當作水路，予頂坵的水流落下坵；嘛有定仔共田底有賰（tshun）的水排出去，遮的動作攏叫做潑田水（phuah tshân-tsuí)，也有人寫做撥田水(puah tshân-tsuí)抑是破田水、剝田水。現此時，有的田用抽水mòo-tà(馬達)抽水，咱叫作抽田水，嘛叫作打田水。親像有人的田佇水尾，定定著愛用馬達抽田水。
阮兜的田大部分倚近水頭，按呢田欲食水、淹水較方便，較毋免佮人相爭(sio-tsinn/sio-tsenn)搶水。
親像這馬抵著(tú-tio̍h)欠水期，作田人會心狂火著( sim-kông-hué-to̍h/sim-kông-hé-to̍h)，無水著無法度犁田播田。過去定定聽著搶水搶共冤家相拍，搪著性地較䆀 (bái)的人，攑(gia̍h)起鋤頭就共人刜(phut)落去，管待伊(kuán-thāi–i)三七二十一，親情兄弟。遮是搶田水的事實故事，阮細漢的時陣，定定聽著。
若是水圳欠水，作穡人顧家己的田園，隨時巡田水，避免水源予人搶走。
講著巡田水，是一件辛苦的代誌，無論透風落雨，棕蓑(tsang-sui)幔咧都出門，抑是三更半暝，外口暗趖趖(àm-sô-sô)，嘛著出門巡田水。巡水圳的擋水水門有夆搝(giú)懸末？水位若變低，水都無法度流入咱的田底。
半暝暗眠摸，作田人攑手電仔巡田頭顧田尾，手電仔的光線照著田岸佮圳溝水，光線照來映去，行到佗位，攏是巡田人，逐家拍一咧招呼，講寡仔客氣話，就分頭去巡家己的田水，遮都是作田人的艱苦，「話若講透更，目屎就掰 (pué)袜離」。
我細漢的時陣，半瞑仔捌佮序大人同齊去巡田水。暗時出門，攑頭一看，半圓的月娘倚佇半天頂，邊仔閣有天星作伴，遠遠暗暗的樹林，飛出閃閃爍爍的火金姑，親像咧共阮𤆬路(tshuā-lōo)，三不五時閣有狗仔的吠聲，裂破(liah-phuà/lì-phuà)恬寂寂的天空，感覺春風微微仔吹，有淡薄仔冷。
序大人目睛金金咧看田岸暗空，水溝的水路有予人塞起來末？我是咧欣賞半暝的夜景。
註解:
1.到今:到現在。
2.洘旱:乾早無雨。
3.絞:碾米。
4.搪著:遇到、碰到。
5.涵空:涵洞、涵管。
6.準若:如果、倘若。
7.好空:好機會、好事情。
8.干焦:只有、僅僅。
9.剷:用鋤頭除草、翻土。
10.賰:剩下的、多餘的。
11.潑田水:灌溉用水引入田裡。
12.撥田水:灌溉用水引入田裡。
13.相爭:互相爭奪。
14.抵著:遇到、碰到。
15.心狂火著:氣急攻心、火冒三丈。
16.䆀:醜陋、或.惡劣。
17.攑:舉、抬、拿。
18.刜:砍。
19.管待伊:管他的。
20.棕蓑:蓑衣，早期農村用棕毛做成的雨具，可以披穿在身上防雨。
21.暗趖趖:黑漆漆，形容漆黑一片。
22.搝:拉扯。
23.掰:撥、拂。用手把東西分開。
24.𤆬路:帶路。
25.裂破:撕毀。
(2021/04/24)
鵝湖民國學案藏經閣 