談割稻仔飯（台語文）

佇阮田莊，一冬有兩擺的割稻仔穡頭誠無閒。拄著割稻仔彼幾工，厝邊隔壁攏會相放伴，今仔日割恁兜的，明仔載割阮兜的稻仔，提這馬上時行的話來講，都是一種共享經濟，割稻仔工共用共享。

毋過倩（tshiànn）人鬥跤手割稻仔，透早著攢（tshuân）茶米茶予人喙焦( tshuì khuah)通啉(lim），因為割稻仔師傅真辛苦，頭戴瓜笠仔（tì kue-le̍h-á）腰著彎咧，那割稻仔那流汗，尤其是六月冬，日頭赤炎炎，逐家作甲大粒汗細粒汗 ，喉焦喙渴(âu-ta tshuì khuah)，主人家著愛不時 （put-sî）攢大鈷茶(tuā kóo-tê)夆啉，若無，連鞭著夆啉了了。

閣上要緊的，著準備割稻仔飯予師傅食中晝。佇厝內竃跤煮好的飯菜，用米蘿擔，一爿囥（khǹg）飯坩(pn̄g-khann)，一爿囥魚肉菜湯，猶閣有大鈷茶。
有閒的人著負責用扁擔擔去田頭路頂，上好揣(tshuē/tshē）有樹蔭通歇涼（hioh-liâng）的所在食中晝，若是無遮蔭的所在，抑是較無日頭，囥佇田岸邊、圳溝邊，嘛是一道食割稻仔飯的好光景。

除了中晝食割稻仔飯外，下晡時日頭漸漸欲落山，稻仔嘛割了。主人家閣攢一桌晚頓，請割稻仔師傅食，遮叫做割稻仔桌，因為穑頭攏做了，主人家愛閣請食晚頓，感謝逐家的辛勞，厝內好料盡出，晚頓有定仔比中晝頓較豐沛（phong-phà）。
講著割稻仔飯，嘛真濟趣味的代誌，來鬥手跤的厝邊隔壁，那食那比較，食飯配話，啥物人的新婦煮的較好食、啥物人怹兜……，有定仔咱煮的 飯菜無合人的胃口，嘛會夆批評甲無一塊好。所以古早做人的新婦是無咧快活矣，跤手無較猛醒(mé-tshénn/mé-tshínn)，定定會夆唸。

阮作囡仔的，生雞卵的無，放雞屎的有，大人咧無閒，囡仔咧枵飽吵
（iau-pá-tshá）。阮以阿(ī-ā)佇竃跤用大鼎煮飯，飯煮熟了後，鼎底有沐（bak)一寡仔臭火焦的鼎疕（tiánn-phí），伊用一寡仔糖摻佇鼎粃內底攪攪（kiáu-kiáu）咧，遮是囡仔上愛食的點心。

1.倩:聘請。

2.攢：準備、張羅
3.止喙焦：止渴。
4.啉:喝。

5.戴瓜笠仔：戴斗笠。
6.喉焦喙渴：口乾舌燥。
7.不時:隨時。
8.大鈷茶：一大茶壺的茶水。
9.囥：放置。
10.飯坩：飯鍋。煮飯或盛裝米飯的容器。
11.揣：尋找。
12.歇涼：休息。
13.豐沛：菜餚豐富。又稱腥臊(tshenn-tshau/tshinn-tshau)

14.猛醒：形容人手腳敏捷、工作勤奮。
15.枵飽吵 ：小孩子不管餓或飽，都會吵鬧不休，泛指無理取鬧。
16.以阿：我們家鄉（彰化縣社頭田中等地方）對母親的稱呼。
17.沐：沾、黏。
18.鼎疕：鍋巴，又有人寫成鼎粃。
19.攪攪：攪拌。