有一个人足興(1)做老師,伊咧教人按怎推銷物件。
有一擺,一个本身是咧賣領帶的生理人(學員)聽伊講課了後,單獨向這位老師請教。要求兩人角色交換,遮叫做「角色扮演」,老師當做人客,生理人按照頭挂仔老師所教的方法向伊推銷領帶,兩人著按呢開始對答。這位老師掠準(2)伊應付誠妥當,著共學員問按呢會曉末?
生理人滿面全土灰,誠濟疑惑,老師共問,是按怎矣?
學員應講,拄才我完全按照老師汝所講的方法做了,毋過(3)汝無共我買領帶矣。
這位老師驚一趒(4),暗中叫苦,我中計 (5)矣,為著證明家己的方法確實有效果,只好(6) 牙齒根咬咧,撏錢(7)共伊買一條。
像這款夆(8)搝(9)著頭鬃仔尾,甚至刁工(10)欹空(11)欲共人創治(12)
的行為,號做「扮豬食老虎」,嘛叫做「浩呆的食宋盼」(13)。
自古以來,傳落來相關的案例誠濟,親像「王允計害董卓、司馬懿詐病騙曹爽、越王勾踐啖(14)夫差的屎」,攏是人人足愛讀的故事。
遮的故事真真假假誠歹定論,毋過予人的啟示是「天外有天,人上有人」,咱做人著「虛懷若谷」,若是做老師,一定愛有腹內(15),真才實學,毋通像「趁食查某假在室,乞食假紳士,腹内無膏假博士」,明明腹內無膏,干焦會曉臭彈。做老師無一定予人任考不倒,若是歹答覆的時陣,著坦白講,汝這个問題,超出我的理解範圍,愛請教別的專家才閣共汝答覆。做人老實上重要,才袂予人「扮豬食老虎」抑是「浩呆食宋盼」,中計矣。
(1)興( hìng):喜好、愛好。
(2)掠準(lia̍h-tsún):認為、以為。對某一事物經分析思考後所作的判斷。
(3)毋過(m̄-koh/m̄-kò/m̄-kù):不過、但是。
(4)驚一趒(kiann-tsi̍t-tiô):嚇一跳。
(5)中計 (tiòng-kè):上當、中圈套。
(6)只好(tsí-hó):只能。
(7)撏錢(jîm-tsînn):掏錢。
(8)夆(hōng):予人、給人。
(9)搝(khiú/giú):拉扯。
(10)刁工(thiau-kang/tiau-kang):故意。
(11)欹空(khia-khang):刁難。
(12)創治(tshòng-tī):抓弄、嘲弄。
(12)號做(hō-tsò/hō-tsuè):叫做、稱為。
(13)浩呆的食宋盼(hàu-tai–ê tsia̍h sòng-phàn):扮豬吃老虎。
(14)啖(tam):嚐。
(15)腹內(pak-lāi):指一個人的內在才學。