囡仔時代，一期稻作佇六月冬收成了後，留落來的稻草袂使四界㧒，愛共摠做一欉一欉，tshāi佇田底曬予焦，了後才擔轉去厝邊空闊的所在，準備疊做草垺。
摠草是一門工夫，疊草垺嘛是一門工夫。細漢時，阮老爸教我按怎摠草，較教都學袂曉，縛袂起來，閣tshāi歪歪，想起來真趣味，嘛誠歹勢；疊草垺是大人的工課，囡仔人毋捌作過，干焦佇草垺跤㧒稻草予頂頭的序大人疊草。講起來做穡愛有兩步七啦，甘遐爾簡單？
草垺疊了後像一座草山，山跤闊闊，山頂小可仔尖尖的。
日後的用途真濟，親像共稻草縛做草絪，遮是灶腳的燃料，煮飯、煮菜、燃滾水時，擲草絪入去灶空燃火煮飯；稻草嘛是牛的飼料，牛上好款待，毋管什物草枝，伊攏欲食，嘛食會飽；稻草閣會使提去曝粟仔埕崁粟仔，避免粟仔予雨沃澹 ，抑是予露水沐著；嘛會使提去崁菜股，寒天時保持土壤的溫度，免予菜穎凍霜著；稻草猶閣會使拍做草索仔。稻仔脫殼了後，牛車著來載稻草，交予草索仔工場。
稻草有特殊的草味，尤其是佇暗頭仔時分，行佇田岸頂，滿四界攏是稻草芳，予人心情做一咧輕鬆起來，遮是上親切的田莊味。
親像這馬，稻草較無利用價值，做穡人就共稻草放火燒燒掉，當作堆肥。六月冬，行過田岸，定定看著田中央有白色煙霧颺颺飛，遮是現此時割稻仔期間，佇農村所看著的現象。風吹白煙過山嶺，是一道足媠的人文風景，毋過恐驚會汙染著空氣，嘛會違反著《空氣汙染防制法》的法律規定。上好的辦法都是規欉稻草軋入去田土內底，予伊自然漚掉，當作有機肥。
細漢時代，草垺佮草垺的空縫是阮佮厝邊隔壁囡仔伴的運動埕，逐家相招佇草垺跤覕相揣，遮是都市囡仔享受袂著的樂趣。
草垺嘛是阿母揣囡仔的所在，暗頭仔時欲食暗頓，厝內序大人攏咧揣怹囝、查某囝，有定仔四箍輾轉揣毋無人，原來逐家耍了足忝的，隨个仔隨个倒佇草垺跤、竹仔跤睏去啦!
遮是我的囡仔時代趣味的代誌，毋知汝有末？
註:
1.四界㧒(sì-kè hiat):到處亂丟。
2.摠(tsáng):一把抓起來，成束、成綑的。
3.tshāi:立也。
4.草垺(tsháu-pû):.
9.曝粟仔(pha̍k- tshik-á):曬稻穀。
10.崁(khàm):覆蓋。
11.沃澹 (ak-tâm):被雨水淋溼。
12.沐著( bak-tio̍h):沾溼。
13.菜股(tshài-kóo)：菜畦。
14.菜穎(tshài-ínn):嫩葉、嫩芽。
15.草索仔 (tsháu-soh-á):草繩。
16.颺颺飛(iānn-iānn-pue):胡亂飛揚。
17.媠(suí):漂亮。
18.軋(kauh)：輾入、壓入。
19.漚(àu):爛掉。
20.毋過(m̄-koh):不過。
21.覕相揣(bih-sio-tshuē/bih-sio-tshē):捉迷藏。一種遊戲。玩的時候，大家選出一個人當鬼來負責抓人，其他的成員就躲起來讓這個人去找，被找到的就換他當鬼。
22.揣(tshuē/tshē):尋找。
23.四箍輾轉(sì-khoo-liàn-tńg):四周、周遭。
24.耍(sńg):玩、遊戲。
25.足忝的(tsiok thiám–ê):非常疲累。
26.隨个仔隨个(suî ê á suî ê):一個一個。
鵝湖民國學案藏經閣 