有一工下晡小可仔清閒，開車去木柵貓空彼咧所在行行走走，沿路欣賞秋天的景色。風輕輕仔丶微微仔吹， 袂真透。日頭光映映，迵過( thàng–kuè)予風弄過來，閣搧(siàn)過去的樹葉佮樹椏，土腳四界攏是會震動的樹影，遮一搭，遐一跡。
天頂的白雲足大簇（tshok），斟酌共看，有長長的橫佇半天中，親像萬里長城，有闊茫茫的親像一團棉花。
出來𨑨迌(tshit-thô)的人那行那舉頭看天邊遐爾濟(hiah-nī-tsē)的雲彩，大塊像棉花，細粒像一蕊花。無定著怹拄好想起中國近代詩人徐志摩的一首詩:《再別康橋》內底的一句詩句:「我揮一揮衣袖，不帶走一片雲彩。」
也有那行那破豆，天南地北，對七月的開鬼門關故事講到八月半中秋月餅，論真，中秋嘛得欲(tit-beh)到矣。
閣有戀愛中的情人，怹那行手牽愈絚(ân），看會出來是猶未嫁娶的款，古早人講遮著是黑狗兄佮黑貓姊的戀情。遮親像《青春嶺》內底的歌詞:「雙人行到青春嶺 鳥隻唸歌送人行」。
唐朝劉禹錫的《秋詞》:「自古逢秋悲寂寥，我言秋日勝春朝。晴空一鶴排雲上，便引詩情到碧霄。」誠認同這句「秋日勝春朝」，遮敢是足濟人咧講的「秋凊」（tshiu-tshìn）天氣?一年內底上好的氣候。
嘛有人那行那翕相，山尾溜的雲彩、遠遠霧霧的台北101大樓，是貓空遊客上佮意 (kah-ì)的翕相景緻。
貓空，到處有青山，隨地有樹蔭，秋風勻勻仔吹，樹葉輕輕仔落落來，嶺頂有雲影天光，步道有樹蔭，這款氣候上適合郊遊。
鵝湖民國學案藏經閣 