2022年父親節懷思

父親節懷思

阿爸親像一座山(台語文)
阿爸親像一座山
目睛金金恬恬咧看顧伊的囝兒，
雖然無大細聲喝咻(huah-hiu)，
總是，
疼惜的話猶原囥( khǹg)佇心肝仔底，
講袂出口。

父愛是座山(華文)
​父愛是座山，
靜默的撫瞰他的兒女，
雖不出聲，
關愛的心已滿懷。

阿爸抾骨的沉思(台語文)
彼一冬的清明節，我佇社頭的埤斗墓仔埔培墓了後，紲落著去發落倩抾骨師整理爸母的骨骸佮進塔的代誌。準備共老爸老母骨骸，提去社頭朝興埔(第六公墓)處理，裝入金斗甕，了後請去靈骨塔安奉。
佇整理作業的時陣，我徛倚佇抾骨師的身軀邊恬恬看，抾骨師足用心，對我爸母的骨骸一一解說枝骨的結構，伊講:「恁老爸的龍骨，對下面算起攏總有五個關節生骨刺，看起来恁老爸一生骨力勤儉，到老攏無通享受著清閒，是一个老實的作穡儂。」彼當時我毋知欲按怎應答。確實，阮老爸陽世活九十歲，一世儂規年迵天攏佮田園黏做伙，就算是拄著過年，伊也干焦歇睏一工，初二透早天袂光就落田去做穑了，伊定定講:「作穑儂閒袂牢」，確實是閒袜牢。
抾骨師講伊生骨刺，我雄雄想起阿爸過身近前幾偌年，有一段真長的時間，隱痀誠嚴重，定定爬佇田頂薅草、剷草;佇菜園仔頂芟莱、挽菜，毋知骨刺帶乎伊偌濟的痛苦佮不方便，阮兄弟竟然攏無去感受到，實在是不孝代。抾骨師講除了骨刺以外，伊的骨頭結構並無各樣，色水紅牙紅牙，真康健，毋是荏身的儂。
即咧時陣，拄好佇天頂咧轉踅的南路鷹發出熟似響亮的啼叫聲，音調悲慘，予儂會喉滇目箍紅，心慒慒。
俗語講:「南路鷹，逐冬轉來哭清明」，逐年的三月底四月頂旬，彰化在地儂攏會拄著轉去北方的南路鷹，佇八卦山頂飛來飛去，又閣拄著清明節，有時嘛號作「掃墓鳥、清明鳥」。
抾骨師小心細貳沓沓仔來，先抾手骨，牽起身，用米酒洗骨，用娘仔絲包頭殻，閣畫鼻佮目眉，龍骨貫紅長線，才請入金斗甕。
想到伊往生前幾個月蹛病院，因為昏迷不醒，最後氣切，倩一个特别護士照顧，一直到進入加護病房，閣載轉去厝內，無偌久就天人永隔了。我有三位親儂，毋捌見遇面的大媽、尚親的阿母佮老爸先後棄世，經過家族談詳，共三位至親的骨骸供奉佇靈骨塔，塔位閣選做伙，除了方便祭拜，也有一家團圓的意思，嘛是阮的心願。
註(台羅拼音):
1.抾骨(khioh-kut):撿骨。
2.培墓(puē-bōng):掃墓。
3.紲落去(suà-lo̍h-khì):接下去。
4.佮(kah):和、及、與、跟。
5.徛倚佇(khiā-uá-tī):站在旁邊。
6.恬恬(tiām-tiām):靜靜地。
7.做穑儂(tsoh-sit-lâng):種田的人。
8.閒袂牢(îng-bē-tiâu):閒不住。
9.薅草(khau tsháu):用手拔除雜草。
10.剷草(thuánn tsháu):用農具拔除雜草。
12.芟菜(sing-tshài):將太過於密集及太小的菜苗拔掉，以利蔬菜成長。
13.偌濟(guā-tsē):多少。
14.各樣(koh-iūnn):異樣，異狀。
15.拄好(tú-hó):剛好。
16.拄著(tú-tio̍h):碰到，遇到。
17.沓沓仔(ta̍uh-ta̍uh-á):慢慢地，漸漸地。
18.蹛(tuà):住進去。(2020/4/9)

(圖:引用蕭平治老師的圖)