天元宮的茶花 (台語文)

山茶花 覕樹椏，
一蕊紅紅綴風吹。
親像隔壁媠阿妹，
恬恬微笑等約會。

山茶花 逐蕊紅，
新春開較足大欉。
幽雅恬恬倚西窗，
予人欣賞鼻清芳。

今仔日，綴著別人的腳步，佮牽手同齊坐車去淡水北新莊天元宮，拍算欲欣賞滿山的櫻花，聽候行入後山，才知影櫻花開過啦，傷慢來，賰的無幾欉。毋過有較贏無，嘛愛翕寡仔相片紀念。
今仔日天氣小可仔烏陰，閣落一點仔雨，規路人客猶原袂少，滿山人影，翕相比YA~~，樂暢心花開，歡喜迎春。樹頂的鳥隻四界飛，四界啼，親像咧歡迎咱逐家做伙來行春。

無櫻花，猶有茶花徛佇遐含笑迎客。我誠欣賞茶花的幽雅，有一點仔富貴，毋過無妖豔之氣，伊的風格袂輸梅花，伊嘛無像牡丹花妖豔貴氣，有人送我「牡丹富貴」的畫，我攏無共掛起來，較俗氣。茶花看起來較樸實。
明朝官員及文學家歸有光的詩《山茶》講:「雖是富貴姿，而非妖冶容。歲寒無後凋，亦自當春風。」確實有影。
註:
1.覕(bih):躲。
2.樹椏(tshiū-ue):樹木末端的小樹枝或從樹幹生出的枝條。
3.綴(tuè):跟、隨。
4.微微:微微笑。
5.倚(uá):靠近。
6.鼻(phīnn):聞。
7.賰(tshun):剩餘。