有一工的中晝(tiong-tàu；中午)，去菜市仔買便當，順紲(sūn-suà；順便)買二盒摻(tsham；加入)粉粿、土豆等等口味的傳統豆花。
這擔豆花擔仔不止仔(put-tsí-á；非常，相當)出名，賣豆花的頭家是一个歐巴桑。人親切，服務態度嘛算袂䆀(bē-bái；不錯，很好)。踅(se̍h；來回走動)菜市仔的人攏知影，毋過無店面。伊賣的豆花是古早味的，料閣實在。
納錢的時陣，拄好有三四个人咧排列聽候。我共伊呵咾:「今仔日，生理誠好喔。」
「無啦，遮人客是汝䆬（tshuā；帶）來的。」伊誠gâu(會)講話，講人客是我䆬來的。莫怪是生理人。
「生理咧欲 (tih-beh；快要)吊鼎，疫情的關係。」伊繼續講落去，「疫情」這二字，改用華語發音。
「阿桑，啥物叫吊鼎?」徛(khiā；站)佇我後壁一个少年家插嘴共問。
「吊鼎著是沒生理。」我代替頭家紲嘴(buē-tshuì；順口，搭腔)共回答。
「是啦，沒生理，咧欲做乞食啦。少年个，汝愛佗一味?」伊那招呼人客那講話。
「我愛粉味？」彼个少年家雄雄(hiông-hiông；突然)講出「粉味」這兩字滾耍笑(kún-sńg-tshiò；開玩笑)的話出來，有較唐突(tông-tu̍t；冒失)，場合佮對話對象無適當。
「阮遮無賣粉味，歹謝。」 伊笑笑仔講，嘴角有一點仔嚴肅。
「喔，按呢，矣(ah；啊)………歹謝。豆花摻綠豆、紅豆，冰礤(tshuah；刨冰)較濟咧。 」少年家共我看一咧，講出愛食物件的名，歐巴桑那聽，腳手誠扭掠 (liú-lia̍h；敏捷)，無二三个手著做好，交予人客，彼个少年仔物件提咧，趕緊走。了後我的後壁無人，我留咧佮伊繼續開講。
「聽汝的口音，親像中部腔?」我共問。
「葫蘆墩，汝知莫？」伊應講。
「知啦，豐原啦。 」我紲嘴應答。
伊看我捾(kuānn；拿，提)塑膠帶仔，內底囥(khǹg；裝，放置)便當。
「汝腹肚未枵(buē-iau；不餓)?」伊問。
我雄雄想著中晝買便當的代誌。有影，這馬，腹肚有淡薄仔枵矣。(2022/12/22)
鵝湖民國學案藏經閣 