癸卯年之禧(台語文)

(漢詩，七絕，押尤韻)
虎隱山林卯兔出，
風光無限展新猷。
疫情漸渺迢迢去，
從此子孫無復憂。

(七字仔，台語文，押ut韻母)
虎隱山林卯兔出，
新正年頭換新齣。
逐家平安無衝突，
互相信任莫背骨。

祝咱親情(tshin-tsiânn；親戚)五十，朋友八十，樓頂樓腳，逐家佇新的癸卯年(kùi-báu nî；2023年，民國112年)，會當「動如脫兔」，兔年行大運，鴻兔大展。
生理人、企業家，經營事業，會當(ē-tàng；可以，能夠)親像兔仔的動作遐爾(hiah-nī；那麼)緊(kín；快速)。遮是兔仔的特性，敏捷、反應緊、嘛較好反爿(píng-pîng；翻身)，無像牛按爾(或「按呢」án-ne/án-ni；這樣)，大隻牛歹反爿。
台灣的生理市場，大部份攏是中小企業，佮兔仔仝款，拄著問題，隨時解決，資金靈活，現金是王，對策足緊，頭過身著過。
俗語講:「歹年冬厚痟人(
pháinn-nî-tang kāu-siáu-lâng)」，舊年進前三冬咱臺灣(應當講是全世界)受到瘟疫的影響，海峽兩岸政治上，親家變冤家，俄烏戰爭發生淒慘的代誌，有寡仔人刁工(thiau-kang/tiau-kang；故意)吵家抐宅(tshá-ke-lā-the̍h，吵鬧不休，不得安寧)，企業經營有氣無力，國家運勢前途堪憂。
台南市北門區南鯤鯓代天府佇今年1月22日(農曆正月初一)早時11點辦理抽國運籤， 結果抽出13年來頭一擺的頂頂籤，第十五籤，甲寅籤。今年國運籤是「唐太宗令武媚娘賞花」，內容是「于今此景正當時，看看欲吐百花魁。若能遇得春色到，一灑清吉脫塵埃」。
看起來，今年的社會運勢應當袂䆀(bē-bái；不錯)才對。佇遮(tī tsia；在這裡)，預祝群友企業家，經營管理有兔仔的特性，敏捷、反應緊、有創新力。