來去關仔嶺

(台語文，七字仔，押ia佮iann韻母)

台灣光景誠有名，上蓋出名關仔嶺；
頂港下港共探聽，逐家歡喜鬥陣行。
廟寺教堂有靈聖，水火同源麒麟精，
山頂山腳參山坪，沿路步道有樹影。
關嶺出名溫泉城，露頭泉水入旅社；
上好阿娘招阿爹，燒燒浸佇尻脊骿。
欲洗身軀無日夜，洗了清爽叫阿娘，
雖然黑黑汝免驚，治病美容顧生命。
嶺頂公園嘛有名，晉淮紀念廣場遮，
百年石頭教堂遐，四界攏是好名聲。

(註)
1.麒麟精(kî-lîn tsiann):根據當地居民傳說，關仔嶺的枕頭山和鏡壁山，山脈相連為一隻神獸公麒麟，水火同源地就是牠的頭，尾巴在紅葉隧道往東延伸處，溫泉區就是麒麟四隻腳所站立的位置，而溫泉就是牠的尿水
2.靈聖(lîng-siànn):靈驗
3.尻脊骿 (kha-tsiah-phiann):背部
4.露頭:溫泉露頭指溫泉自然湧出之處
5.浸佇(tsìm tī ):浸在
6.遮(chia):這裡
7.遐(hia):那裡

頂幾工，佮(kap；和)幾位朋友去關仔嶺𨑨迌，遊山玩水。參拜大仙寺佮碧雲寺；行碧雲寺後壁的步道，有定仔peh懸(peh-kuân；爬高)，有定仔落崎(lo̍h-kiā；下坡)；佇枕頭山邊欣賞水火洞，水火同源，予我想起小學畢業旅行的時陣，捌(bat；曾經)來看一擺，嘛已經60年一甲子矣。

煞落來佇旅社內底洗黑黑土色的溫泉水，叫做「泥漿溫泉」，滑溜滑溜，感覺袂䆀 (bē-bái；不錯)，佮別所在的溫泉無仝款；閣去嶺頂公園參觀吳晉淮紀念廣場，伊个《關仔嶺之戀》，我自細漢唱甲大漢，上會記得的歌詞是「嶺頂春風吹微微　滿山花開正當時」，這馬去關仔嶺著是這種的春天光景；嶺頂閣有一个所在嘛愛去參觀，著是百年石頭基督教教堂，伊的特色是規間教堂是用石頭鞏(khōng；砌)起來的，有特色。