查某孫生日快樂(台語文)

查某孫，兩姐妹。in出世的時陣，差無兩三秒鐘，彼陣身懸(kuân)無精差，這馬己經8歲，兩人的身懸卻是有淡薄仔(tām-po̍h-á)出入，一人一款命。

好佳哉，天公有照顧，兩个查某囡仔(gín-á)攏誠精光(tsing-kong)，中文、英語輾轉(liàn-tńg)，台語嘛會通，閣學著真濟業餘專長。

人講「生囝無是師父，飼囝才是師父」，8年來in爸母出偌濟(luā-tsē)氣力，細漢的時陣，用心咧照顧，教導正確的做人行為，才未發生「細漢偷挽匏，大漢偷牽牛」 這款遺憾(uî-hām）的事誌(tāi-tsì)，才有今仔日的成長。後壁的路猶誠長，顒望(ǹg-bāng)in佇人生的路途頂，會曉觀前顧後，參考別人的意見，堅決行家己的路。

大人會老，囡仔會大漢，這嘛是in學轉大人的過程，雖然辛苦，毋過，「樹頭企予在，樹尾才未做風颱。」頭前較(khah)艱苦，後壁才有成人(tsiânn-lâng)的人生。