田螺含水過冬(台語文)

田螺含水會過冬，
艱苦忍辱度一工。
若逢春來露水重，
翻身再起一尾龍。

講著「田螺含水過冬」這句台灣諺語，有一位過去輔導的客戶，伊是中小企業的頭家，共我問一件經營管理的大代誌，都是佇新冠肺炎疫情期間，政府疫情管控，造成公司的營業收入減足濟，定定欠現金。

伊問:「是欲等到底時(tī-sî)？敢有啥物對策?」

遮是大哉問，因為佇景氣誠䆀(bái)的時，抑是像這馬新冠肺炎期間，企業若無(nā-bô)接著新的訂單，無人客買咱的物件，就無應收數款(siàu-khuán)通收，無現金收入。

親像有寡仔小食店，疫情期間，政府規定人客袂使佇店內用餐，致使人客毋敢來交關(kau-kuan)，干焦(kan-ta)賰(tshun)外送爾爾，根本無啥收入。管理界有一句話講:「現金是王」，意思是咧講像這馬景氣遐爾(hiah-nī)䆀，會使講是盤古開天以來，企業拄著(tú-tio̍h)毋捌拄著的困難，企業經營者(頭家)欲按怎度過這个難關？欲按怎度過䆀景氣的寒天(kuânn-thinn)，抑是度過新冠疫情的坎站(khám-tsām)?

因此，我佮這位頭家回講:「著愛學過冬的田螺會含水的精神，忍耐度過寒天，等待春天來臨落雨積水時，閣再靈活起來，若親像一尾活龍，四界趖來趖去。」

問題是欲按怎含水，賰(tshun)現金?

理論上是先分析EBITDA(稅前、利息前、折舊及攤銷前的利純) = 稅後淨利 + 稅費 + 利息費用+折舊及攤銷。其中折舊攤銷只是數字爾爾，毋是真正開掉。因此，分析EBITDA，會當將折舊攤銷還原倒轉來，將稅後利純加上折舊攤銷，算算看偌濟，著有法度真正反應企業本身的盈利能力佮自由現金流，針對遮的情形，觀察正確數字，才有好對策。

閣來，觀察公司的現金流動，就知影企業資金的運作是毋是誠靈活？譬如講，頂游的供應商期待下游的客戶較緊付數款，伊就提供數款拍折的優待予客戶，這陣(tsit-tsūn)，公司著愛考慮比較一下，共銀行借錢來還這筆數款支出，銀行利息比折扣聲數，佗一个(tó tsi̍t ê)較有利？若準折扣聲數較有利，就用折扣方式趁利息錢，毋過現金有夠末？嘛是愛傷重考慮的。若是公司欠現金，閣毋法度借款時，甘願用較長的票期，以減少時到無法度兌現的現金的壓力，嘛毋通貪著折扣的好處。為著減少現金支出的壓力，保持手中較濟的現金，增加現金流量，親像減少固定資產的投資，抑是股票、債券、基金的投資，猶有拍賣庫存成品等，有法度佇經濟真䆀的時陣應付公司的基本開銷著好，儉腸凹肚( khiām-tn̂g-neh-tōo)過日子。含水的意思就是保持一定數量的現金，來維持基本開銷，親像日常零用金支出，員工的工資，毋通予員工吃虧，嘛愛佮員工溝通，共體時艱。另外，原物料的採購，著想辦法共應付數款期間延長，但遮愛佮供應商談詳抑是談判，爭求怹的諒解。理所當然，公司的競爭力愈強，談判著愈有利。