一个童乩，一个桌頭(台語文)

童乩桌頭講好勢，
一个目神知詳細。
若欲問神去災厄，
這款代誌特別濟。

有一擺，去街路果子行買弓蕉，我共頭家講買半枇(pî)都好，伊講袂使，阮無咧賣半枇，愛買規枇，我應講:「這馬熱天，厝內無遐濟人食弓蕉，恐驚囥久會濫，歹吃。」我較按怎共姑情(koo-tsiânn)，伊攏毋肯。

拄好怹某徛佇邊仔，看我遐呢堅持，就講:好啦，買予伊，半枇賣予你。怹翁才無啥仔情願，切半爿(pîng)賣我，那切那講:若毋是阮某咧講，是無可能賣汝半爿的，會了錢呀！老大。伊稱呼我老大。

我那撏錢(jîm tsînn)，心內那想，遮敢無是叫作「一个童乩，一个桌頭」？一个做白面，一个做黑面。國語叫做:「一個扮白臉，一個扮黑臉。」

「一個乩童、一個桌頭」是咧講兩人鬥空、串通好勢，互相有共識，演戲予外口人看，達成某一種目的。
佇這咧世間上，各行各業，若欲講「一个童乩，一个桌頭」的故事足濟咧，較講都講袂完，用手比个較緊。